Gerduan Kemp is ’n naam wat al hoe meer erkenning kry in Suid-Afrika se lewendige musiekbedryf.
Hierdie talentvolle 27-jarige kunstenaar, gebore en getoë in Bloemfontein, het groot vordering gemaak in sy musiekloopbaan, sowel as sy werk as ’n musiekvideo-vervaardiger. Sy besluit om drie jaar gelede na Pretoria te verhuis, was ’n keerpunt in sy reis, en dit het intussen vrugte afgewerp.
“Ek het geweet as ek wou sukses behaal in die Afrikaanse musiekbedryf, moes ek in Pretoria wees,” sê Gerduan. Die bruisende stad het hom die blootstelling en geleenthede gegee wat in Bloemfontein beperk was, en Pretoria het hom die platform gebied om in die wêreld van Afrikaanse musiek te groei.
Gerduan se liefde vir musiek het van kleins af begin. Hy het reeds in graad twee met kitaarlesse begin, maar dit was eers tydens sy studies in Kommunikasiekunde en Mediastudies dat hy besluit het om voltyds op musiek te fokus. Tydens sy studies het hy sy eerste liedjie geskryf en dit in sy huis se kamerstudio opgeneem – ’n eenvoudige opstelling wat sy doen-dit-self-gees weerspieël. Hierdie benadering het ook gestrek tot sy loopbaan as musiekvideo-vervaardiger, waar hy sy eerste musiekvideo vir sy enkelsnit “Vergewe my as ek” verfilm het.
In 2019 het Gerduan sy debuut-enkelsnit, “Vergewe my as ek,” vrygestel, wat deur aanhangers goed ontvang is en vinnig momentum opgebou het. Die musiekvideo het reeds meer as 12 000 kyke op YouTube. Sedertdien het hy aanhou om gewilde treffers soos “Slapelose Nag” en “Dagbreekdrome” uit te bring, wat steeds geliefd bly onder sy groeiende aanhangers.
Benewens sy musiekloopbaan bestuur Gerduan ook sy eie fotografie- en videografie-besigheid, GK Kreativ Productions. Sy vermoë om sy passie vir musiek te kombineer met sy kreatiewe oog vir visuele kuns, het hom onderskei as ’n veelsydige kunstenaar. Ten spyte van sy besige skedule, bly Gerduan daartoe verbind om sy kuns te slyp. Sy nuutste enkelsnit, “Sesde Sintuig,” geskryf deur Johan Oberholzer, word tans goed ontvang deur radiostasies landwyd.
Gerduan se musiekinspirasie kom van kunstenaars soos Niall Horan, Elandré en Daughtry – musikante wat bekend is vir hul verhaalvertellings en betekenisvolle lirieke. Hy streef daarna om dieselfde diepte en emosie in sy eie werk te plaas. “Ek glo dit is belangrik om al jou talente te gebruik,” sê hy, en voeg by dat hy, ondanks geen formele klavieropleiding nie, homself geleer het om te speel en homself moeiteloos tydens vertonings begelei.
Gerduan droom daarvan om eendag saam met plaaslike kunstenaars soos Elandré en Tarryn Lamb te werk, en met sy aanhoudende dryfkrag en passie is dit duidelik dat hierdie veelvuldige talentvolle kunstenaar se beste nog voorlê.
Sy nuwe enkelsnit “Koffie in die Kroeg” is sy eerste stap in ’n nuwe rigting na musiek wat hy voel wat hy wil doen en nie nood wendig wat gewild is nie.
Die nuwe snit gaan gepaard met ’n musiekvideo wat by The Social Grill in Pretoria-Oos geskiet is.
“Vir my, veral met Koffie in die Kroeg, het ek gesê ek wil doen wat ek wil doen,” verduidelik hy.
Die liedjie verteenwoordig ’n wegstap van die idee om te dink aan wat gewild sal wees.
“Met van die vorige goed, het ek gedink: ‘Wat wil die mense hê?’ Maar vir my as kunstenaar is dit so belangrik om vir die mense iets eg te gee.”
Die liedjie dra ’n sterk persoonlike element, met lirieke wat geïnspireer is deur sy eie ervarings van vreemd en uit plek voel.
“Ek is nie regtig ’n groot sosiale persoon nie,” erken hy.
“Ek wou die storie vertel van hoe ek in ’n vreemde situasie was waar ek nie noodwendig inpas nie.”
Gerduan het gesê dat die liedjie soortgelyk is aan sy skuif na Pretoria, aangesien hy op die perfekte tyd in sy loopbaan verhuis het, terwyl hy die uitdaging aangepak het om in nuwe plekke in te pas.
“Dit was presies die regte tyd om na Pretoria te trek, want ek dink as ek twee jaar voor dit hierheen getrek het, sou niks soos nou gewees het nie.
“Maar in die konteks van die liedjie, dink ek ons almal was al op ’n paar plekke waar ons op die regte plek op die verkeerde tyd was.”
Related Content
