Deur: Martie Swanepoel. Artikel uit die Februarie 2015 uitgawe van Rooi Rose Tydskrif.
Skrywer Paul C. Venter is bekend daarvoor dat hy die siel van Suid-Afrikaners op papier kan neerpen. In sy jongste TV-reeks, ‘Vlug na Egipte‘ gooi hy onder meer agt vroue op ‘n Karoodorpie bymekaar waar daar intriges onder die Karoostof broei
Daar is min plekke waar jy die vreedsame stilte van die natuur so kan ervaar soos op ‘n Karoodorpie. Dis net onder die mense op die dorpie waar die rede soms kan lol; veral wanneer ‘n vreemde gesin intrek en die rustige samesyn so ‘n bietjie versteur.
Dis die agtergrond waarteen Paul C. Venter, skrywer van TV-reekse soos Konings, Torings en Arende, se jongste reeks, Vlug na Egipte, hom afspeel.
Die reeks wat op 13 Januarie op kykNET begin, is op Hanover verfilm. Human Stark is die vervaardiger en regisseur. Kykers wat sy werk ken, sal sonder twyfel vir die volgende 13 weke vasgenael voor die kassie sit.
Die agt vroue in die TV-reeks het uiteenlopende geaardhede, maar die aktrises wat hulle uitbeeld, het almal ‘n passie vir die reeks en vertolk hul uiteenlopende rolle met oorgawe
‘Lena is ‘n geskenk direk uit die hand van die Here’
– Clara Joubert
“Met ‘n skrywer van die formaat van Paul C. Venter en die gesoute rolverdeling, gaan die reeks vir seker baie gewild wees,” voorspel sy.
Ons onthou vir Clara as Hester van Tonder in destyds se gewilde, komiese TV-reeks Orkney Snork Nie. Sy het ook in Vloeksteen (kykNET) en die rolprent Abel gespeel.
Clara se Vlug na Egipte is beslis nie jou stereotipiese reeks nie: “Dit sal tot almal spreek. Die verhaal werp lig op ons almal se ego’s, vrese, vooropgestelde idees en vooroordele.”
Sy sê die rol het haar in die diepste deel van die blou see gegooi maar dit was presies wat sy nodig gehad het om ná twintig jaar weer ‘n TV-rol te kon speel.
“Gelukkig was die regisseur, Human Stark, daar om te help. Hy het my gestroop van al my gewoontes en my gehelp om met vertroue in Lena se lyf in te klim.”
Sy moes ook tuis raak in Lena se rolstoel. Sy sê die karakter, ‘n suksesvolle skilder, is ná ‘n tragedie aan ‘n rolstoel gekluister. Dit maak dit vir haar moeilik om haar ten volle as kunstenaar uit te leef en ook as vrou en ma haar plek behoorlik vol te staan.
‘Lea is ‘n bietjie van ‘n tomboy. Sy sê ‘n ding soos hy is en het nie tyd vir meisieagtige strooi nie.’
– Leandie du Randt
Leandie was al te sien in Strikdas, Hollywood in my Huis, Die Windpomp, Mooirivier, Klein Karoo en Semi-Soet. In Vlug na Egipte speel sy die rol van Lea, ‘n spitsvondige, effe seunsagtige karakter met ‘n persoonlikheid wat baie fasette het. “Sy probeer nog uitpluis waar haar plek in die lewe is,” vertel Leandie.
Sy sê Vlug na Egipte is “een van die mooiste stories” wat sy tot nog toe gehoor het.
“Die storie is so goed geskryf en verfilm dat die kykers heeltemal sal opgaan in die opregtheid, skande, liefde, hartseer en geluk van die karakters. Ek is seker ons ervaring van ‘n klein plekkie, soos Hanover waar ons geskiet het, het die span gehelp om die egtheid van kleindorpse stories te verstaan.
“My hart en siel het op stel elke woord van die ervare akteurs opgeslurp sodat ek soveel moontlik kon leer. En ek het, sjoe!”
‘Ek dink die vuur in Breggie sal liefde in die publiek se harte stook’
– Kay Smith
“Ek is bevoorreg dat ek kon saamwerk aan die oordra van mense se stories. Dis nie aldag dat die waarheid, maak nie saak hoe mooi of hoe lelik. ontbloot word soos dit regtig is nie,” sê Kay. Breggie is 18 en werk in Dot se winkel. Sy bly weg van intimiteit omdat sy die gevare van MIV maar te goed ken.
Sy het baie drome, soos om stories te skryf.
“Regisseur Henry Mylne het gesê jy het sekere ervarings nodig om ‘n rol eerlik te kan vertolk. Hierdie karakter het my kom wys hoe waar dit is. Ek moes gaan rondkrap in ‘n dark place, daar waar ons emosies en ervarings versamel en jy leer om in enige karakter eerlik te kan wees. My karakter het diep in my hart gekruip en soms het ek met haar oor haar keuses en optrede baklei asof sy my jonger suster is,” sê sy.
‘Gertjie skrik nie vir ‘n barfight nie, sy is gutsy, onopgesmuk, sexy, het ‘n droë sin vir humor, ‘n vuil bek en ‘n hart van goud’
– Rolanda Marais
Gertjie boer op Daggafontein met skape en is op soek na liefde ná haar man met ‘n ander vrou weggeloop het. Met haar perd en skaaphond, Bekka, bestuur sy vrou-alleen die plaas.
“Gertjie is een van die lekkerste karakters wat ek tot nog toe gespeel het. Boonop was my mede-akteurs fenomenale kunstenaars,” vertel Rolanda wat bekend geword het as Stefanie in kykNET se Binnelanders.
Sy sê sy was verslaaf aan die rol nog voordat sy die teks klaar gelees het.
“Dit was soos ‘n boeiende boek te lees. Paul C. Venter is ‘n meesterskrywer. Dit was boonop ‘n bonus om op Hanover in die Karoo te skiet en tussen die ware Karoliete te bly.”
‘Dot het so baie lagies, wat jy buite sien, is nie noodwendig wat binne aangaan nie. Sy’s ‘n strawwe roker, dra nooit grimering nie en het ‘n droë sin vir humor’
– Marion Holm
Marion Holm speel Dot Volschenk, ‘n slagoffer van regstellende aksie. Na sy haar pos verloor het, trek sy Karoo toe waar sy ‘n winkel begin.
“Ek is mal oor die storie. Vir my is die storie van enige TV-reeks belangriker as die tegniese deel. Paul C. Venter se storie is so intens dat ek nie die teks kon neersit nie. Elkeen van die karakters het in my hart kom asemhaal.
“Ek het vooraf geweet dat daar twee rolle is wat ek sou kon speel. Toe ek die dialoog lees, het ek geweet al wat ek wou hê, is Dot se rol, al is dit die kleiner rol. Ek was buite myself toe ek hoor ek het die rol gekry – Dot is presies die mens wat ek graag sou wou wees. Ek sou met haar vriende kon wees.
“So baie mense, binne en buite die bedryf, dink ek kan net die komiese eenvrouvertonings speel waarmee ek so lank my eie werk geskep het. Dit was juis daarom vir my ‘n groot geleentheid om Dot te kon speel, want sy is nie ‘n komiese karakter nie maar dit beteken nie dat sy nie soms komies is nie!”
‘Roulien was ‘n sterk karakter, maar fisiek was sy op haar einde”
– Keziah Jooste
Keziah Jooste was in 1998 die tweede prinses in die Mej. SA-kompetisie en was te sien as Errol se ma in 7deLaan.
“Die storielyn van Vlug na Egipte is eg aan Suid-Afrika. Hanover was boonop die perfekte plek om te skiet, veral omdat MIV hier ook soos ‘n plaag deur die dorpie sweef.”
Dit het vir haar gevoel sy loop in Roulien se skoene toe sy deur die gebied stap. Dit het haar meer insig gegee in die luilpeloosheid waarin MIV die karakter gedompel het.
Roulien was op haar dag ‘n skoonheid. Sy wou net die beste vir haar tweeling gee en toe tref die MIV-tragedie haar en sy bekommer haar oor wat van haar babas gaan word as sy sterf.
Keziah sê sy was bevoorreg om ‘n paar jongkinders op die dorpie te ontmoet wat MlV-positief is.
“Hulle het lekker gesels. Die vlekkies op hul gesiggies sal ek nooit vergeet nie. Ook nie die armoede en die weerloosheid en luilpeloosheid wat ek daar gesien het nie.”
‘Charlie is ‘n komplekse karakter wat geskoei is op ‘n vrou wat op Hanover gebly het. Sy is geweldig eksentriek’
– Diane Wilson
“Dis ‘n plesier om Paul Venter se dialoog te speel,” sê Diane Wilson wat onthou word vir haar rol in Arende 1 en Arende II.
Charlie is van Britse afkoms. Sy het in die koloniale Indië grootgeword en later alles in Zimbabwe verloor. Sy het Karoo toe gevlug en met die verkeerde man ‘n verhouding aangeknoop. Sy is ‘n kluisenaar en smag na vriendskap,” vertel sy.
“Ek het ‘n paar liefdesverhoudings in die reeks en dit is nogal ‘n prestasie vir ‘n vrou van my jare. Ek word 74!”
Haar karakter neem sandbaddens en op 74 moes Diane toe ook die eerste keervan kroontjie tot toontjie in die sand begrawe word.
Sy het groot agting vir regisseur Human Stark. “Akteurs hou van horn omdat hy presies weet wat hy wil hê en nooit kwaad word nie,” sê sy.
‘Sanna Retief leef in die verlede. Sy is ‘n ingewikkelde, donker, bitter en effe af karakter’
– Karen Wessels
Elke karakter in Vlug na Egipte is uniek en eg, sê Karen. “Hul verhoudings is interessant en kompleks. Sanna se karakter is net ‘n druppel aan die emmer maar dis ‘n rol wat ek vir niks sou verruil nie. Sy het my die geskenk gegee om die ernstige kant van my spelvermoë uit te leef.
“Dit was groot, uitdagend, maar presies waarna my kunstenaarshart gesmag het.”
Sy sê Sanna Retief is die distriksverpleegster wat glo haar ontslape minnaar, Meester, verskyn aan haar. “Sy steur haar nie daaraan dat almal op die dorp haar uitlag oor haar liefde vir ‘n spook nie. Haar omstandighede frustreer haar en dryf haar na effe malligheid.
“My heel eerste televisierol as professionele aktrise was in Sterk Skemer wat ook deur Paul geskryf is. Om weer die kans te kon kry om een van sy tekste te vertolk, was ‘n onverwagse loopbaanbonus.”
Related Content
